Acts 9

Soolo Bereꞌaruꞌnaꞌ

(Kar 22:4-16; 26:9-18)

1Tenang eeꞌnang tee Soolo domange sipukoꞌnang teing Ovoring bakanariong tavuꞌkoo. 2Eeꞌnoko tee eeꞌnara piristiꞌ deto basi-anko pora niaꞌkuuꞌ niiꞌning karavotoning~ daarievuuꞌnaang, bera teing kompui pava dootuuꞌnanka-koo Damaskasie otoining-koo nanuma aaꞌnooꞌnaang: donkaang eeꞌnoko maniiꞌ Karistooꞌ siompaakoꞌning oovurira deekoꞌ daiꞌurira Jerusalemaꞌ beꞌantavuriiꞌnaang. 3Bera tee teketa nanuma Damaskas-navuntuꞌkoo dueꞌarako taꞌning-antanaꞌ paning-eta arakai siisioi korovui tooꞌpuuꞌnung. 4Eeꞌnoko teꞌ doonko kansiꞌkoo duaꞌarara aurong taaravuuꞌ aaꞌpuko, “Daꞌ Soolo, Soolo, ning aming-koo dake mankiꞌantamemaung?” 5Eeꞌnoko teie aaꞌpuuꞌ, “Daꞌ baa Ovoring?” Eeꞌnoko aaꞌpuuꞌ, “Ning eeꞌnara Jiisuuꞌ dake mankiꞌantamemaung. Nkaang kara dimpaꞌema daka baikeraramaung irintoꞌ deemparako.” 6Eeꞌnoko Sooloi aaꞌnaꞌ taꞌninui dankurankuꞌarama aaꞌpuuꞌ, “Ninge aming nkoamaꞌnaang, Ovoring?” Eeꞌnoko teie Ovoringe aaꞌpuuꞌ, “Enang donkonira teꞌ Damaskas beaing, eeꞌnoko teka nauraavaing kapooꞌ dake nkoveaing.” 7Teing nantoong tee ninka nariꞌ nanaakoꞌning teing teke kareaavaꞌ donkonai otorouꞌnung, aurong taaravaama, teka naning ooaavaꞌ. 8Teketa kansiꞌketa deto iꞌamparara Soolo duta bantoma makotuaruuꞌ kapooꞌ oo-koo. Eeꞌnoko tee bireng-koo kompai ootavauꞌ Damaskas-aape. 9Bera beenang doong kaputuꞌari otoi taamang eeꞌnoko ntong-koo naikuaꞌ.

Ananaiasie Soolo Duta Bantang-antavuuꞌnaꞌ

10Enang tee teke naning narung Ovoring bakanavitu-koong otokoꞌnung miring Ananaiasi. Ovoringe tee tee-koo oroꞌparara karavuma aaꞌpuuꞌ, “Ananaiasi ee.” Eeꞌnoko teie aaꞌpuuꞌ, “Ovoring ee, ning aung.” 11Eeꞌnoko Ovoringe nauvuma aaꞌpuuꞌ, “Naniaing taunavunge miring Koontoꞌnavunge, bera Judasi bakanava-koo niaꞌkiaing naning oo-koo miring Soolo, Taasus-nung. Tee kunsiaramang teke. 12Eeꞌnoko kunsiarama niiꞌnaung~koo bereꞌarara naning miring Ananaiasi pora bireng panteꞌuko oovuing duta bantang-anta-koo.” 13Teka Ananaiasie makuꞌuma aaꞌpuuꞌ, “Ovoring, ning tee nantoonge mmauꞌke naumaako taaravamaung tee. Nantoong dakaning aaꞌnaꞌ orakaꞌ nkovurimaung Jerusalemaꞌka. 14Eeꞌnoko tee aung tauraꞌ otoꞌevung piristiꞌnanka-koo ovontunge avauꞌnung daiꞌkoo teing nantoong anke dakaang miring-koo baitoarimaing.” 15Teka Ovoringe aaꞌpuuꞌ tee, “Beai, aiꞌ tee tee naning ninge tero miruꞌantuꞌnung nkaang miring nkavui nanuma daankivuuꞌnaang ookara nantoong-koo, aaꞌning-koo Juꞌdeeaing, dauraronanka, eeꞌnoko teing Isireeli-nupoong. 16Eeꞌnoko damaꞌke tee ninge nau-antavampaing tee aaꞌnaꞌ baike kuneꞌuainaꞌ nkaang miring kompuitaaꞌ.”

17Teeꞌ minkuvuioꞌ Ananaiasi siarara pava-koo koinuuꞌ. Bera tee-koo bireng panteꞌuma aaꞌpuuꞌ, “Mmaikoꞌ, Soolo, teie Ovoring Jiisuuꞌke daꞌkoo oroꞌparieenge taunge daꞌ poieenavung-koo ning botomuing daꞌ napoꞌ ookira Tanuaang Meekunge maantoꞌduuꞌnaang.” 18Eeꞌnoko tenang teeꞌpuko taꞌninaꞌ kapooꞌ tenteng-pinaꞌ oroꞌ Soolo bakaang duta-ita duaꞌarako napoꞌ ookuuꞌ. Eeꞌnoko tenang teketa iꞌamparara ntong-koo minkiaioꞌ meekaꞌantavaruꞌ. 19Eeꞌnoko taamanura purimparuꞌ.

Soolo Daankiaruꞌnaꞌ Damaskasie

Teketa niiꞌning doonge Karistooꞌ bakanavitu ninka otorouꞌ teke Damaskasie. 20Eeꞌnoko pava dootuuꞌnanka-koo namuꞌke daankinang tutumparuꞌ Jiisuuꞌ eeꞌ siraꞌpuma, “Tee tee Kumponing Bauring.” 21Eeꞌnoko teing ookara tee taaravauꞌning taꞌninaama aaꞌpauꞌ, “Aung ee tee naning Jerusalemaꞌke teing aung Jiisuuꞌ miring tampaama baitoaamaing tooreerevurimaung deeaꞌ? Eeꞌnoko teeꞌ nariꞌ napoꞌ temuriiꞌ aarumo nko-koo aꞌ poi daiꞌurima piristiꞌnanka biikaang ovontung-anko tavoꞌkoo.” 22Teka Soolo aaꞌnaꞌ masikaꞌ deto irikumparakoꞌ eeꞌnoko Juꞌkoong ovontung Damaskasie otorokoꞌning apooꞌurikoꞌ sirakaꞌantavuma Jiisuuꞌ tee eeꞌnara Kumponinge nantoong domampuri tarevuriainooꞌkoo tero Pakoꞌpariꞌuuꞌnung~.

23Bera mmauꞌ doong divuꞌuioꞌ Juꞌkoong ovontunge mumunsiauꞌ dupisiꞌaavaꞌnaang tee. 24Teka tee biikaang mumunsinang tavaavaꞌnaang nempaakoꞌnung osi karanaang aaꞌning-koo doong eeꞌnoko muung, taaravuuꞌ. 25Teka baꞌmaikoriꞌke muunga mmariꞌantavaama burunge doonko osi-koong parang-koo damaꞌdue sing-antavauꞌ kaꞌbaraaꞌkoo otoko.

Soolo Jerusalemaꞌ Toroarara Otokoꞌnaꞌ

26Eeꞌnoko tenang Jerusalemaꞌ pora teing Karistooꞌ bakanavitu navu-koo paaravarakoꞌ, teka teing avoreaakoꞌ tee-koo Karistooꞌ bakanavitu-koong-pinaꞌ masikaꞌantavaavaruma. 27Teka Banabasie bokuvura kara okovuri nkanuka-anko beꞌantavura sirakaꞌantavuuꞌ teing-koo teie Ovoringe taunga karavuko oovuuꞌnaꞌ eeꞌnoko teeꞌ tee Damaskasie avoroaꞌ Jiisuuꞌ bakaang miring ninka daankiaruꞌnaꞌ. 28Bera tee teing ninka data-antaveera teke Jerusalemaꞌke aaꞌnaꞌ iriꞌoi Ovoring bakaang miring-koo daankinang nkovukoꞌnung. 29Napoꞌ aaꞌnaꞌ nariꞌ karavurima deepaikoꞌeekoꞌ teing Juꞌnupoong Kirikiꞌnaꞌ kareaakoꞌning Jiisuuꞌ masikaꞌantavaavaruma, eeꞌnoko teinge dupisiꞌaavaꞌnaang besiꞌaakoꞌ. 30Eeꞌnoko tenang teinge nariꞌ baito-nupoonge tasiꞌpaara Sisariaꞌnavuntuꞌaape beꞌantavauꞌ. Teketa napoꞌ kato bakanooꞌ Taasus-aape botoauꞌ.

31Enang tee Soolo bereꞌaruꞌnooꞌketa dootuuꞌnupoong Judiaꞌke eeꞌnoko Kaaleliꞌke eeꞌnoko Sameriaꞌke otorokoꞌning mooa-koo otoroi purimpariruꞌnung, eeꞌnoko Ovoring-koo meeꞌduꞌpiariri otoroko Tanuaang Meekunge domang kuaaꞌantavurioꞌ berempariruꞌ.

Piitai Inias Taare-antavuuꞌnaꞌ

32Teketa tenang Piitai beeroꞌurima avitoitoi nanukoꞌnang, teeꞌ nanuma Liida-namono-koo pouꞌ Ovoring kakeꞌiiariri siompaamaing-anko. 33Teeꞌ nanuma naning doota miring Inias kuneꞌuuꞌ mareꞌ ~beenaumo-taa-koo pankaroong bempari nariꞌ otokoꞌnung. 34Eeꞌnoko Piitai aaꞌpuuꞌ tee, “Inias, teie Jiisuuꞌke, Kumponinge tero Pakoꞌpariꞌniiꞌke daꞌ taare-antaruing. Deto donkonira dakaang taniꞌ kaiꞌeai.” Eeꞌnoko namuꞌke deto iꞌamparuꞌ tee. 35Bera Liida-nupoonge eeꞌnoko Saaron-nupoonge ooaara tee Ovoring-aape bereꞌariruꞌ teing.

Piitai Tabita Booꞌketa Daaꞌuuꞌnaꞌ

36Teketa napoꞌ nani manikuma Jiisuuꞌ siompukoꞌnani miring Tabita, niiꞌnooꞌ Dookasi otokoꞌ. Teni teni tampani, papovuruꞌnanka pakuvurikoꞌnani. 37Tenang tee batei-koo teni siipavora booꞌparuꞌ. Eeꞌnoko duuꞌpaara daunavaro-koo bempauꞌ. 38Teꞌ Liida Joopaꞌketa dueꞌ deemparako, eeꞌnoko Piita teke otoko taaravaara teinge Liida-nupoonge Jiisuuꞌ siompaakoꞌninge kenaanka naninka botoaaretuꞌ Piita bokuvureeꞌnaang aaꞌpaama, “Aung ee, namuꞌke poai niiꞌanko.” 39Teketa tee Piita tenaanka ninka nariꞌ porouꞌnung. Tenang tavoꞌarako tee teinge daunavaro-koo beꞌantavauꞌ teꞌ ookara naaroonku donkonai biromparikoꞌnooꞌ. Eeꞌnoko nau-antavauꞌ teing amutemuriiꞌ baarong Dookasie pateꞌukoꞌnanka tenang teni teing ninka otoi.

40Teka Piitai teing ookara damaꞌdu botovurira kinkinura kunsiaruꞌ. Bera mono-aape bereꞌarara aaꞌpuuꞌ, “Tabita, iꞌantaravai.” Eeꞌnoko teni duta bantoma Piita oovura deto baꞌnanuuꞌ. 41Bera Piitai bakaang birenge kompura deto iꞌampuuꞌ. Eeꞌnoko ookara baito-nupoong teing ninka naaroonkunanka ninka nariꞌ bokuvurira teni domampoꞌ avuruꞌ. 42Eeꞌnoko ookarai Joopaꞌnavuntuꞌnupoonge taaravaara karingai Ovoring masikaꞌantavauꞌ. 43Bera Piita tee teke Joopaꞌke mmauꞌ doong otouꞌnung niiꞌnara Saimoniꞌ bakanavaꞌkoo, kauꞌ karenaumo-koong dopaꞌ takeraꞌuma baavevukoꞌnung bakanava-koo.